1-октябрдан 10-октябргача Нижний Новгород шаҳрида “Нелегал-Кордон” номли федерал тезкор-профилактик тадбир ўтказилди. Операция давомида ҳуқуқ-тартибот органлари ходимлари 248 та манзилни текшириб, 807 нафар хорижлик фуқаронинг ҳужжатларини назоратдан ўтказди.
Текширувлар натижасида миграция қонунчилигини бузиш билан боғлиқ жами 541 та ҳолат қайд этилди. Энг кўп қоидабузарликлар Россияда бўлиш қоидаларини бузиш (295 та протокол) ва хорижликларни ишга жалб қилиш тартибини бузиш (118 та протокол) билан боғлиқ бўлди. Шунингдек, миграция ҳисобига қўйиш тартибини бузиш бўйича 44 та, ноқонуний меҳнат фаолияти учун 38 та ва бошқа турдаги маъмурий ҳуқуқбузарликлар бўйича протоколлар расмийлаштирилди.
Қонунбузарликлар натижасида 55 нафар хорижлик фуқарога Россия Федерацияси ҳудудидан маъмурий тартибда чиқариб юбориш жазоси тайинланди. Бундан ташқари, 39 нафар шахсга нисбатан Россияга киришни тақиқлаш тўғрисида қарор қабул қилинди.
Операция давомида ноқонуний миграцияни ташкил этиш, сохта ҳужжатлар тайёрлаш ва чет эл фуқароларини сохта рўйхатга олиш каби жиноятлар бўйича ҳам жиноий ишлар қўзғатилди. Ҳуқуқни муҳофаза қилувчи органлар мигрантлар билан профилактик суҳбатлар ўтказиб, уларни қонунбузарликлардан огоҳлантирди.
