Нижневартовск шаҳрида Россия ИИВ ходимлари ва Росгвардия махсус бўлинмалари иштирокида миграция қонунчилигига риоя этилишини текшириш бўйича комплекс профилактика тадбирлари ўтказилмоқда. Рейдлар давомида хорижликлар яшайдиган жойлар, қурилиш майдончалари, савдо ва хизмат кўрсатиш объектлари кўздан кечирилди.
Текширувлар натижасида Россия Маъмурий ҳуқуқбузарликлар тўғрисидаги кодексининг 18.8–18.17 ҳамда 19.27-моддалари бўйича жами 69 та маъмурий баённома расмийлаштирилди. Ушбу моддалар хорижликларнинг мамлакатга кириш, қолиш ва ишлаш қоидаларини бузиш, шунингдек, миграция ҳисобига оид нотўғри маълумотлар тақдим этиш каби қоидабузарликларни ўз ичига олади.
Қонунчиликни жиддий тарзда бузганлиги аниқланган 12 нафар хориж фуқаросига нисбатан Россия Федерацияси ҳудудидан маъмурий тартибда чиқариб юбориш тўғрисида қарор қабул қилинди. Ҳуқуқ-тартибот органлари мазкур йўналишдаги профилактика ишларини давом эттирмоқда.
Мигрантларга ўз ҳужжатларининг тўғрилигини ва ишлаш ҳамда яшаш қоидаларига риоя этилишини доимий назоратда сақлаш тавсия этилади. Қонун бузилишларининг олдини олиш учун барча рухсатномалар ва рўйхатдан ўтиш ҳужжатлари белгиланган тартибда бўлиши шарт.
