Санкт-Петербургнинг Приморский туманида 22 ёшли Марказий Осиё фуқароси ҳуқуқ-тартибот органлари ходимларидан қочишга урингани учун қўлга олинди. Воқеа 11-октябр куни эрталаб Богатирский проспекти, 16-уй яқинида содир бўлган. Патрул хизмати ходимларини кўрган ҳайдовчи «Hyundai Solaris» русумли автомобилига ўтириб, воқеа жойидан тезлик билан узоқлашишга ҳаракат қилган.
Полиция ходимлари автомобилни таъқиб қила бошлаган, бироқ ҳайдовчи тўхташ ҳақидаги талабларга ва огоҳлантирувчи сигналларга бўйсунмаган. Королев проспектида полиция ходими «Полиция тўғрисида»ги федерал қонунга мувофиқ, ҳавога ўқ узган. Шундан сўнг, ҳайдовчи машинадан тушиб, пиёда қочишга уринган, аммо Комендантский проспекти, 36-уй, 2-қурилма яқинида ушланган.
Текширув натижаларига кўра, 22 ёшли йигит Россия ҳудудида миграция қонунчилигини бузган ҳолда бўлгани аниқланган. Ҳозирда у полиция бўлимига олиб кетилиб, унга нисбатан бир нечта маъмурий баённомалар расмийлаштирилган. Мигрант махсус қабулхонага жойлаштирилган ва унга нисбатан жиноий иш қўзғатиш масаласи кўриб чиқилмоқда.
Таъкидлаш жоизки, ушбу ҳудудда сўнгги пайтларда миграция қонунчилиги билан боғлиқ бир нечта ҳолатлар қайд этилган. Хусусан, аввалроқ ҳужжатларни текшириш вақтида бир гуруҳ ишчилар қурилаётган бино томига яширинишга урингани, шунингдек, депортациядан қочиш учун инспекторга пора таклиф қилган шахс қўлга олингани хабар қилинган эди.
