Россия Федерал хавфсизлик хизматининг (ФХХ) Қўрғон ва Тюмень вилоятлари бўйича чегара бошқармаси ходимлари «Бирдамлик-2026» махсус операцияси доирасида 200 дан ортиқ хорижий фуқаронинг мамлакатга киришига рухсат бермади. Расмий маълумотларга кўра, ушбу шахсларнинг киришига турли сабабларга кўра тақиқ қўйилган.
Шунингдек, операция давомида чегара режими ва давлат чегарасини кесиб ўтиш қоидаларини бузган 73 нафар шахс маъмурий жавобгарликка тортилган. Қоидабузарларга нисбатан белгиланган жарималарнинг умумий суммаси 330 минг рублни ташкил этди.
Мазкур тадбирлар Қозоғистон чегара хизматлари билан ҳамкорликда амалга оширилди. Операциядан кўзланган асосий мақсад трансчегаравий жиноятчилик, жумладан, одамларни ноқонуний олиб ўтиш ва тақиқланган юклар ҳаракатига чек қўйишдан иборат бўлган.
Назорат тадбирларида ФХХ, Федерал божхона хизмати, Ички ишлар вазирлиги, Миллий гвардия ходимлари ҳамда маҳаллий аҳоли вакиллари иштирок этди. Россия чегарасини кесиб ўтишни режалаштираётган фуқаролар ҳужжатлар тартибига ва кириш тақиқлари мавжуд эмаслигига олдиндан эътибор қаратишлари тавсия этилади.
