Россияда ҳайдовчилик гувоҳномасини олиш бўйича имтиҳон қоидалари босқичма-босқич янгиланмоқда. 2027-йил 1-мартдан бошлаб назарий имтиҳон жараёнида назорат кучайтирилади. Хусусан, имтиҳон хоналарида аудио ва видео ёзувлар олиб борилади, номзодлар эса суратга олинади. Ушбу чора-тадбирлар имтиҳон жараёнининг шаффофлигини таъминлаш ва техник воситалар ёрдамида кўчириш ҳолатларининг олдини олишга қаратилган.
Имтиҳон вақтида телефон, фото, аудио ёки видео техника, шунингдек, бошқа электрон қурилмалар ва маълумотномалардан фойдаланганлик аниқланса, номзоднинг натижалари бекор қилинади. Бундай қоидабузарлик учун жазо чораси сифатида номзодга кейинги имтиҳонга кириш ҳуқуқи 12 ой муддатга тақиқланади.
Амалий имтиҳонни топшириш тартибида ҳам ўзгаришлар мавжуд. Назарий имтиҳондан муваффақиятли ўтган номзод амалий имтиҳонни 60 календар кун ичида топшириши шарт. Агар ушбу муддат ичида амалий қисм топширилмаса, номзод қайтадан назарий имтиҳон топширишига тўғри келади. Қайта назарий имтиҳон эса белгиланган муддат тугаганидан кейин 30 календар кундан кечиктирилмай ўтказилиши лозим.
Шунингдек, 2027-йил 1-мартдан тиббий маълумотномаларни тақдим этиш тартиби соддалашади. Агар маълумотлар соғлиқни сақлаш тизимининг ягона давлат ахборот тизимидаги федерал реестрда мавжуд бўлса, қоғоз шаклидаги маълумотномани тақдим этиш талаб қилинмайди. Бироқ, ҳайдовчилик гувоҳномасини олиш жараёнида тиббий кўрикдан ўтиш талаби бажарилмаса, ҳужжат бериш рад этилиши мумкин.
