2026-йил 14-октябр куни бўлиб ўтган Россия Давлат Думасининг ялпи мажлисида депутат Максим Гулин бюджет даромадларини ошириш бўйича янги таклифларни илгари сурди. Унинг таъкидлашича, давлат ғазнасини тўлдириш учун фуқаролар солиқларини кўпайтириш ўрнига, муқобил манбалардан фойдаланиш мақсадга мувофиқдир.
Депутат томонидан таклиф этилган чора-тадбирлардан бири хорижлик ишчилар учун патент қийматини қайта кўриб чиқишдан иборат. Парламентарийнинг ҳисоб-китобларига кўра, патент нархларининг оширилиши Россия давлат бюджетига йилига қўшимча 75 миллиард рубль миқдорида маблағ олиб келиши мумкин.
Шунингдек, мажлисда «ақлли протекционизм» сиёсати доирасида Россияда ишлаб чиқариладиган хорижий товарларга мақсадли божлар жорий этиш таклифи ҳам муҳокама қилинди. Ушбу чора орқали бюджетга қарийб 164 миллиард рубль қўшимча даромад тушиши прогноз қилинмоқда.
Максим Гулин бюджетни шакллантиришда «яширин схемалар»дан воз кечиш ва маҳаллий ишлаб чиқаришни ривожлантириш муҳимлигини таъкидлади. Ҳозирча патент нархларини ошириш бўйича таклиф фақат ташаббус даражасида бўлиб, унинг қачон ва қандай тартибда кучга кириши ҳақида аниқ муддатлар келтирилмаган.
