Россия Молия вазирлиги маълумотларига кўра, жорий йилнинг апрель ойидан июль ойигача бўлган даврда нақд валютани ноқонуний олиб чиқишга уриниш билан боғлиқ 291 та ҳолат аниқланган. Ушбу ҳаракатлар натижасида қарийб 180 миллион доллар қийматидаги маблағларнинг мамлакатдан чиқиб кетишининг олди олинди.
Сентябрь ойида қабул қилинган янги тартибга кўра, жисмоний шахсларга Ўзбекистон, Тожикистон, Озарбайжон ва Евроосиё иқтисодий иттифоқи (ЕОИИ) мамлакатларига 1 миллион рублдан ортиқ нақд пул олиб чиқиш тақиқланади. Юридик шахслар ва якка тартибдаги тадбиркорлар учун эса ушбу давлатларга нақд пул олиб чиқиш умуман ман этилади.
Қоидаларни бузган тақдирда, жисмоний шахсларнинг 1 миллион рублдан ошган қисми, юридик шахслар ва якка тартибдаги тадбиркорларнинг эса барча нақд маблағлари мусодара қилинади. Истисно тариқасида, халқаро аэропортлар орқали банк ҳисобварақларидан ечиб олинганлигини тасдиқловчи ҳужжатлар тақдим этилганда валюта олиб чиқишга рухсат берилиши мумкин.
Ушбу чоралар Россиядан капиталнинг ноқонуний чиқиб кетишини камайтириш ва молиявий интизомни кучайтириш мақсадида жорий этилган. Россия ҳукумати яқин уч ой ичида мамлакатдан олиб чиқилаётган нақд рублларни ҳисобга олиш тартибини тасдиқлаши кутилмоқда.
