Самара вилояти Меҳнат, бандлик ва миграция сиёсати вазирлиги томонидан 2027-йилда хорижлик фуқаролар учун солиқ юкини оширишни кўзда тутувчи қонун лойиҳаси ишлаб чиқилди. Ҳозирги вақтда ушбу ҳужжат коррупцияга қарши экспертизадан ўтказилмоқда.
Қонун лойиҳасига кўра, чет эллик ишчиларнинг меҳнат фаолиятидан олинадиган даромад солиғи миқдори тоифасига қараб ойига 12 048 рублдан 17 068 рублгача этиб белгиланиши таклиф этилмоқда. Шунингдек, 2027-йилдан бошлаб мигрантлар ўз қарамоғидаги ҳар бир бола учун ойига 6 024 рублдан 8 534 рублгача тўлов амалга ошириши талаб қилиниши мумкин.
Бундан ташқари, минтақада ишловчи хорижликлар учун яшаш минимуми коэффициенти 1,5 даражасида белгилаш таклиф этилмоқда. Бу ўзгариш Россияга ишлаш учун келган фуқаролар ўзлари ва улар билан бирга келган оила аъзоларини ушбу коэффициентга кўпайтирилган яшаш минимуми миқдоридан кам бўлмаган маблағ билан таъминлашлари шартлигини англатади.
Ушбу ташаббуслар тасдиқланган тақдирда, Самара вилоятида меҳнат қилаётган Ўзбекистон фуқаролари ўзларининг ойлик харажатларини режалаштиришда ушбу янги солиқ ва мажбурий тўловларни ҳисобга олишлари лозим бўлади.
