Россиянинг Қўрғон вилояти Целинний округидаги қишлоқ хўжалиги корхонаси хорижлик фуқарони ишга қабул қилиш ва бўшатиш жараёнида миграция қонунчилигини бузгани учун икки марта жаримага тортилди. Суд ҳужжатларига кўра, ҳар бир қоидабузарлик учун корхонага 200 минг рубл миқдорида жарима белгиланган.
Текширувлар июн ойида миграция бўлими томонидан амалга оширилган. Аниқланишича, корхона хорижлик ходим билан меҳнат шартномаси тузилгани ва унинг бекор қилингани ҳақидаги хабарномаларни расмийлаштиришда хатоликларга йўл қўйган. Хусусан, хабарнома бланкалари нотўғри тўлдирилган, ҳужжатлар тартиб бўйича тикилмаган ва рақамланмаган.
Шунингдек, ҳужжатларда шахсни тасдиқловчи ҳужжат тури нотўғри кўрсатилган (паспорт ўрнига яшаш гувоҳномаси ёзилган) ва хорижлик фуқаронинг меҳнат фаолиятини амалга ошириш асоси нотўғри белгиланган. Корхона ўз айбини тан олган ва умумий ҳисобда 400 минг рубл миқдорида жарима тўлашига тўғри келган.
Ушбу ҳолат иш берувчилар учун хорижлик ходимларни ишга қабул қилишда миграция ҳужжатларини қатъий тартибда ва амалдаги қонунчилик талабларига мувофиқ расмийлаштириш муҳимлигини кўрсатади.
