Boshqirdistonning Dyurtyulin tumanida istiqomat qiluvchi xorijlik fuqaro sud qarori bilan o'ziga meros bo'lib o'tgan yer uchastkasini sotishga majbur qilindi. Bu haqda respublika prokuraturasi matbuot xizmati xabar berdi.
Aniqlanishicha, mazkur shaxs 2014-yildan buyon qishloq xo'jaligi maqsadlariga mo'ljallangan yer uchastkasiga mulk huquqi asosida egalik qilib kelgan. Yer unga otasidan meros bo'lib qolgan. Biroq Rossiya qonunchiligiga ko'ra, xorijiy fuqarolar qishloq xo'jaligi yerlariga faqat ijara huquqi asosida egalik qilishlari mumkin.
Prokuratura tekshiruvi natijasida ushbu holat qonun buzilishi deb topildi. Qonunga binoan, agar xorijlik shaxs bunday turdagi yer uchastkasiga egalik qilsa, u bir yil muddat ichida yerni begonalashtirishi (sotishi) shart. Belgilangan muddat o'tganiga qaramay, mulk egasi yerni sotmagani sababli prokuratura sudga da'vo arizasi kiritgan.
Sud prokuraturaning talabini to'liq qanoatlantirdi. Endilikda xorijlik fuqaro o'ziga tegishli bo'lgan yer uchastkasini ommaviy savdolar orqali sotishga majbur etildi.
