Yekaterinburg shahrida yashovchi fuqaro xorijlikdan 6,5 million rublga avtomobil sotib olib, to'lovni naqd pul ko'rinishida amalga oshirgani uchun yirik jarimaga tortildi. Sverdlovsk viloyati sudlari matbuot xizmati xabariga ko'ra, xaridor Rossiya valyuta rezidenti, sotuvchi esa rezidentlik maqomiga ega bo'lmagan chet el fuqarosi bo'lgan. Rossiya qonunchiligiga ko'ra, rezident va norezident o'rtasidagi bunday oldi-sotdi operatsiyasi valyuta operatsiyasi hisoblanadi va u faqat bank hisobvaraqlari orqali amalga oshirilishi shart.
Bojxona organlari tekshiruvi davomida to'lov naqd pulda o'tkazilgani aniqlangan. Natijada xaridorga nisbatan Rossiya Ma'muriy huquqbuzarliklar to'g'risidagi kodeksining 15.25-moddasi 1-qismi bilan bayonnoma tuzilgan. Bojxona idorasi noqonuniy operatsiya summasining 20 foizi miqdorida, ya'ni 1 million 300 ming rubl jarima belgilagan. Yekaterinburgning Lenin tuman sudi va Sverdlovsk viloyat sudi ushbu qarorni o'z kuchida qoldirdi.
Huquqshunos Yevgeniya Sabitovaning tushuntirishicha, Rossiyada doimiy yashash uchun ruxsatnomasi (VNJ) bo'lmagan har qanday chet el fuqarosi valyuta qonunchiligida norezident hisoblanadi. Agar sotuvchida VNJ bo'lmasa, u bilan avtomobil oldi-sotdisini naqd pul bilan amalga oshirish taqiqlanadi. Bunday holatda to'lov faqat sotuvchining Rossiya bankidagi hisob raqamiga o'tkazilishi, akkreditiv yoki eskrou-hisob raqamlari orqali bajarilishi talab etiladi.
Mutaxassislar bitim tuzishdan oldin sotuvchining hujjatlarini, xususan, pasporti va VNJ mavjudligini tekshirishni tavsiya qiladi. Agar to'lov naqd shaklda amalga oshirilsa, jarima miqdori noqonuniy operatsiya summasining 20 foizidan 40 foizigacha yetishi mumkin. Shuni yodda tutish kerakki, belgilangan jarima to'langandan keyin ham avtomobil uchun to'lov majburiyati bekor bo'lmaydi.
