Chuvashiston Respublikasining Komsomolsk okrugida huquq-tartibot organlari tomonidan o'tkazilgan tezkor-profilaktika tadbiri davomida O'zbekiston davlat raqamiga ega «Yutong» rusumli avtobus to'xtatildi. Tekshiruv jarayonida transport vositasi salonida bo'lgan 64 nafar yo'lovchining hujjatlari ko'zdan kechirildi.
Aniqlanishicha, yo'lovchilar orasida 18 nafar shaxs Rossiyada qonuniy bo'lish asoslarini yo'qotgan. Mazkur fuqarolar migratsiya qonunchiligini buzganliklari uchun ma'muriy javobgarlikka tortildi. Sud qaroriga ko'ra, ushbu shaxslar Rossiyadan majburiy tartibda chiqarib yuboriladi va ularga 5 yil muddatga mamlakatga kirish taqiqlanadi. Hozirda ulardan 5 nafari Ichki ishlar vazirligining xorijiy fuqarolarni vaqtincha saqlash markaziga joylashtirilgan.
Tekshiruv davomida jami 40 ta huquqbuzarlik holati qayd etildi. Migrantlar majburiy tibbiy ko'rikdan o'tishdan bo'yin tovlash hamda Rossiyaga kirishda e'lon qilingan maqsadga rioya qilmaslik kabi qoidalarni buzganlikda aybdor deb topildi.
Shuningdek, avtobus haydovchisiga nisbatan ham chora ko'rildi. U noqonuniy maqomdagi har bir yo'lovchi uchun 2,5 ming rubldan jarima to'lashi belgilandi. Huquqni muhofaza qiluvchi organlar migrantlarni Rossiya hududida bo'lish qoidalariga qat'iy rioya qilishga va barcha hujjatlarni o'z vaqtida rasmiylashtirishga chaqirmoqda.
