18-avgust kuni Moskvadagi «Sadovod» bozorida ikki nafar Tojikiston fuqarosi — Xasanchon R. va Yorgibegi M. huquq-tartibot organlari tomonidan qo‘lga olindi. Erkaklarning bozor hududiga ayollar kiyimida kirib kelishi atrofdagilarning e’tiborini tortgan va qisqa vaqt ichida politsiya xodimlari voqea joyiga yetib kelgan.
Sud jarayonida ushbu shaxslarga nisbatan Rossiya qonunchiligiga muvofiq «LGBT* targ‘iboti» moddasi bo‘yicha ma’muriy bayonnomalar rasmiylashtirilgan. Sud qaroriga ko‘ra, ularning tashqi ko‘rinishi va kiyinish uslubi «noan’anaviy jinsiy munosabatlarni shakllantirishga qaratilgan» deb topilgan.
Sudda aniqlanishicha, qo‘lga olingan shaxslarning har ikkisi ham oilali va farzandlari bor (biri bir nafar, ikkinchisi to‘rt nafar farzandning otasi). Shunga qaramay, sud ularning har birini 10 sutkalik ma’muriy qamoq jazosiga hukm qildi.
Jazo muddati tugaganidan so‘ng, ushbu shaxslar Rossiya Federatsiyasidan majburiy tartibda deportatsiya qilinishi belgilandi. Hozirgi vaqtda ular xorijiy fuqarolarni saqlash markazida saqlanmoqda.
*Rossiya Federatsiyasida taqiqlangan harakat.
