Rossiya Federal xavfsizlik xizmati (FXX) mamlakat chegaralarida xorijlik fuqarolar uchun filtratsiya tadbirlari o'tkazilayotganini tasdiqladi. Sud hujjatlariga ko'ra, chegaradan o'tayotgan shaxslar maxsus so'rov va mobil qurilmalarni tekshirish jarayonidan o'tkazilmoqda. Ushbu tartib 2024-yil bahoridan, ya'ni «Krokus Siti Holl»dagi voqealardan so'ng kuchaytirilgan.
Tekshiruvlar davomida xavfsizlik xodimlari xorijliklarning telefonlaridagi messenjer yozishmalarini ko'zdan kechirmoqda. Xususan, yozishmalarning o'chirilganligi yoki YouTube platformasidagi ko'rishlar tarixi tahlil qilinadi. Agar qurilmada Rossiyada taqiqlangan targ'ibot materiallari yoki radikal mazmundagi videolar aniqlansa, shaxsning mamlakatga kirishiga ruxsat berilmasligi mumkin.
Sud materiallarida qayd etilishicha, tekshiruvlar chog'ida oddiy tugmali telefon taqdim etgan fuqarolarga ham shubha bilan qaralib, ularning kirishi rad etilgan holatlar kuzatilgan. FXX vakillari telefonlar tekshiruv uchun ixtiyoriy ravishda topshirilganini ta'kidlamoqda. Mazkur filtratsiya jarayonlari natijasida O'zbekiston va Tojikiston fuqarolarining Rossiyaga kirishi rad etilgani bo'yicha 9 ta sud qarori aniqlangan.
Ushbu holatlar migrantlar uchun chegaradan o'tishda qo'shimcha ehtiyotkorlik talab etilishini anglatadi. Mutaxassislar chegaradagi nazorat jarayonlari kelgusida ham davom etishi mumkinligini qayd etishmoqda. Shu sababli, Rossiyaga kirib kelayotgan xorijliklar chegaradagi tekshiruvlarga tayyor bo'lishlari va mobil qurilmalaridagi ma'lumotlar qonunchilik talablariga zid emasligiga e'tibor qaratishlari tavsiya etiladi.









