Rossiya IIVning Chelyabinsk viloyati bo‘yicha Migratsiya masalalari boshqarmasida xorijiy fuqarolarga vaqtincha yashash uchun ruxsatnoma (RVP) berish bo‘yicha kvotalarni taqsimlash komissiyasining navbatdagi yig‘ilishi bo‘lib o‘tdi. Ushbu kvotalar Rossiya hukumati tomonidan tasdiqlangan qoidalar asosida ajratiladi.
2026-yil uchun Chelyabinsk viloyatiga jami 25 ta kvota o‘rni belgilangan. Joriy yil boshidan buyon komissiya tomonidan 38 ta ariza ko‘rib chiqilgan bo‘lib, shundan 5 nafar xorijiy fuqaroga kvota ajratilgan. Hozirgi kunda viloyat bo‘yicha foydalanilmagan kvotalar soni 20 tani tashkil etadi.
Kvota olish uchun ariza topshirgan fuqarolarning hujjatlari komissiya tomonidan alohida tartibda ko‘rib chiqiladi. Ijobiy qaror qabul qilingan taqdirda, xorijiy fuqaro joriy yil yakuniga qadar vaqtincha yashash ruxsatnomasini olish uchun tegishli hujjatlarni rasmiylashtirishi shart.
Kvota ajratish bo‘yicha ariza-anketalarni topshirish Chelyabinsk viloyatidagi barcha hududiy migratsiya bo‘linmalarida amalga oshiriladi. Qo‘shimcha ma’lumotlar olish uchun 8 (351) 733-57-57, 733-57-47, 733-57-37, 733-57-52 yoki 733-57-51 telefon raqamlariga murojaat qilish mumkin.
