Rossiyada mehnat faoliyatini amalga oshirayotgan chet el fuqarolari o‘zlarining ishga joylashganliklari to‘g‘risidagi xabarnomani (uvedomlenie) «Gosuslugi» portali orqali elektron shaklda taqdim etishlari mumkin. Bu jarayon vaqtni tejashga va idoralarga shaxsan borish zaruratini kamaytirishga yordam beradi.
Jarayonni boshlash uchun «Gosuslugi» portalidagi «Maks» roboti orqali «уведомление трудовой деятельности» so‘rovini kiritish va «подать уведомление» hamda «создать заявление» tugmalarini bosish kerak. Shundan so‘ng, tizim sizdan ish beruvchi turini (yuridik shaxs, yakka tartibdagi tadbirkor yoki jismoniy shaxs) tanlashni va shaxsiy ma’lumotlaringizni tasdiqlashni so‘raydi.
Keyingi bosqichlarda pasport ma’lumotlari, patent raqami, mehnat shartnomasi tafsilotlari (turi, sanasi, kasb va ish joyi manzili) hamda ixtiyoriy tibbiy sug‘urta (DMS) ma’lumotlarini kiritish talab etiladi. Shartnomani tizimga yuklash uchun uni oldindan PDF formatiga o‘tkazib olish tavsiya etiladi. Yakuniy qadamda ish joyi joylashgan hududdagi IIV bo‘limini tanlab, arizani yuborishingiz kerak.
Ma’lumotlar yuborilgach, ular odatda bir-ikki kun ichida ko‘rib chiqiladi. Ariza muvaffaqiyatli qabul qilinganidan so‘ng, portalda «usluga okazana» degan yozuv paydo bo‘ladi. Ushbu holat xabarnoma rasman topshirilganligini anglatadi. Xatoliklarga yo‘l qo‘ymaslik uchun kiritilayotgan barcha ma’lumotlarni, xususan, ish beruvchining INN va boshqa rekvizitlarini mehnat shartnomasiga mosligini tekshirib olish muhimdir.
