Rossiya Ichki ishlar vazirligi tomonidan tasdiqlangan 2026-yil 22-maydagi 322-sonli buyruqqa asosan, 2026-yil 17-dekabrdan boshlab xorijiy fuqarolar uchun patent rasmiylashtirishning yangi tartibi kuchga kiradi. Ushbu sanaga qadar avvalgi 695-sonli reglament amal qiladi.
Yangi qoidalarga ko'ra, patentni rasmiylashtirish, qayta rasmiylashtirish va dublikat olishning yagona maksimal muddati 10 ish kuni etib belgilandi. Shuningdek, hujjat topshirish va olish jarayonida navbatda turishning eng ko'p vaqti 15 daqiqa qilib belgilandi, bu esa xizmat ko'rsatish tezligini oshirishni nazarda tutadi.
Endilikda patent uchun hujjatlarni «Gosuslugi» portali orqali ham topshirish imkoniyati yaratilmoqda. Arizaning holati, ya'ni uning tayyor bo'lgani yoki rad etilgani haqidagi bildirishnomalar ham aynan shu portal orqali yuboriladi. Shuni yodda tutish kerakki, yangi reglamentga ko'ra, patentni ko'p funksiyali markazlar (MFC) orqali olish nazarda tutilmagan.
Migrantlar 17-dekabrdan boshlab ushbu o'zgarishlarga moslashgan holda hujjatlarini rasmiylashtirishlari tavsiya etiladi. Yangi tartib hujjat topshirish jarayonini raqamlashtirish va kutish vaqtini qisqartirishga qaratilgan.
