Rossiya Raqamli rivojlanish vazirligi chet el fuqarolari uchun «Gosuslugi» portalidagi hisob qaydnomasini tasdiqlash tartibini soddalashtirishni rejalashtirmoqda. Unga ko'ra, foydalanuvchilar endilikda ko'p funksiyali markazlar (MFT) yoki banklarga tashrif buyurmasdan, biometrik identifikatsiya orqali o'z shaxsini tasdiqlashlari mumkin bo'ladi.
Yangi tartibga ko'ra, Rossiyaga safar qilishdan oldin chet el fuqarosi «ruID» ilovasida o'z biometrik ma'lumotlarini ro'yxatdan o'tkazishi va tashrif to'g'risidagi ma'lumotlarni to'ldirishi kerak bo'ladi. Davlat chegarasini kesib o'tish chog'ida, avvalgi tartibda bo'lgani kabi, shaxsga SNILS rasmiylashtiriladi va «Gosuslugi»da tasdiqlanmagan hisob qaydnomasi yaratiladi.
Shundan so'ng, shaxsni biometriya yordamida tasdiqlash jarayoni amalga oshiriladi. Foydalanuvchi ilova orqali kameraga qarashi kifoya qiladi va ma'lumotlar mos kelgan taqdirda, hisob qaydnomasi darajasi avtomatik ravishda «tasdiqlangan» maqomiga o'tadi.
Ushbu o'zgarishlar migrantlarga davlat raqamli xizmatlaridan foydalanishni sezilarli darajada osonlashtiradi. Xususan, tasdiqlangan hisob qaydnomasi orqali SIM-kartalarni qo'shimcha idoralarga bormasdan rasmiylashtirish imkoniyati yaratiladi.
