Moskva va Moskva viloyatida mehnat faoliyatini amalga oshirish uchun patent olishni istagan chet el fuqarolari uchun muhim ogohlantirish e'lon qilindi. Rasmiy ma'lumotlarga ko'ra, patentni vositachilar orqali rasmiylashtirishning imkoni yo'q va bunday xizmatlarni taklif qilayotgan shaxslar firibgarlardir. Hujjatni olishning yagona qonuniy yo'li — Saxarovo ko'p tarmoqli migratsiya markaziga shaxsan tashrif buyurishdir.
Vositachilarga murojaat qilish migrantlar uchun jiddiy huquqiy va moliyaviy xavflarni keltirib chiqaradi. Xususan, patent rasmiylashtirish muddatini (Rossiyaga kirgandan so'ng 30 kalendar kun) o'tkazib yuborish 10 mingdan 15 ming rublgacha bo'lgan jarimaga sabab bo'ladi. Firibgarlar ko'pincha soxta shtrix-kodli stikerlarni taqdim etishadi, ammo ular bilan haqiqiy patent olishning iloji yo'q.
Shuningdek, vositachilar ishga joylashish to'g'risidagi bildirishnomalarni topshirishda yordam berishni va'da qilib, katta miqdordagi mablag'ni o'zlashtirib olish holatlari ham kuzatilmoqda. Bunday hollarda Rossiya IIV bazasida tegishli ma'lumotlar bo'lmagani sababli, migrantning patenti keyinchalik bekor qilinadi.
Migratsiya markazi xodimlari ijtimoiy tarmoqlardagi shaxsiy xabarlar yoki izohlar orqali xizmat taklif qilayotgan shaxslarga pul o'tkazmaslikni qat'iy tavsiya qiladi. O'zini markaz xodimi deb tanishtirgan shaxslar bilan bog'liq har qanday shubhali holatlarda pul mablag'larini o'tkazmaslik va faqat rasmiy kanallar orqali ma'lumot olish zarur.
