Rossiya qonunchiligiga ko'ra, xorijlik ota-onalar Rossiya fuqaroligiga ega bo'lgan farzandlari asosida mamlakat fuqaroligini olish huquqiga ega. Muhim jihati shundaki, ushbu imkoniyat farzand 18 yoshga to'lgan taqdirda ham o'z kuchini saqlab qoladi.
Farzandi voyaga yetgan ota-onalar uchun fuqarolikni rasmiylashtirishda quyidagi shartlar talab etiladi: farzand Rossiya fuqaroligiga ega bo'lishi, ota-onaning amal qilish muddati o'tmagan yashash guvohnomasi (VNJ) bo'lishi hamda Rossiyada doimiy ro'yxatdan o'tgan bo'lishi tavsiya etiladi. Agar farzand voyaga yetmagan bo'lsa, tartib biroz farq qiladi va bunda Rossiya fuqarosi bo'lgan ikkinchi ota-onaning vafot etishi, bedarak yo'qolishi yoki ota-onalik huquqidan mahrum qilinishi kabi holatlar asos bo'lishi mumkin.
Fuqarolikni olish jarayoni bir necha bosqichdan iborat: dastlab migratsiya hisobiga turish, vaqtincha yashash ruxsatnomasini (RVP) olmasdan to'g'ridan-to'g'ri yashash guvohnomasini (VNJ) rasmiylashtirish, doimiy ro'yxatdan o'tish va fuqarolik uchun hujjatlarni topshirish kerak. Hujjatlar topshirilgandan so'ng, qaror qabul qilinishi uchun uch oygacha muddat talab etiladi.
Ijobiy qaror chiqqanidan so'ng, shaxs qasamyod qabul qiladi va Rossiya pasportini rasmiylashtirishi mumkin. Hujjatlarni topshirishdan avval Rossiya IIVning hududiy bo'linmalariga murojaat qilib, talab etiladigan hujjatlarning aniq ro'yxatini tekshirib olish tavsiya etiladi.
