Rossiya Davlat Dumasida mehnat migrantlari va xorijiy mutaxassislar uchun kasallik varaqasi bo'yicha to'lovlarni amalga oshirishning yangi tartibi muhokama qilinmoqda. Davlat Dumasining Mehnat, ijtimoiy siyosat va faxriylar ishlari bo'yicha qo'mitasi a'zosi Svetlana Bessarabning ma'lum qilishicha, ushbu o'zgarishlar qonunchilik talablarini yagona standartga keltirishni nazarda tutadi.
Yangi tashabbusga ko'ra, xorijlik ishchilar vaqtinchalik mehnatga layoqatsizlik nafaqasini olish huquqiga faqatgina sug'urta badallari to'langanidan keyin olti oy o'tgach ega bo'lishlari mumkin. Hozirgi kunda bunday cheklov mavjud emas va xodim ishga joylashishi bilanoq nafaqa olish imkoniyatiga ega bo'lishi mumkin.
Deputatning tushuntirishicha, mazkur chora sug'urta badallari miqdori to'lanishi kutilayotgan nafaqa summasiga mutanosib bo'lishini ta'minlash maqsadida kiritilmoqda. Shu bilan birga, xorijlik fuqarolar uchun shoshilinch tibbiy yordam ko'rsatish tartibi o'zgarishsiz qoladi, biroq boshqa turdagi ijtimoiy to'lovlarni olish uchun belgilangan muddat davomida ishlash talab etiladi.
Ushbu tashabbus Rossiyada vaqtincha bo'lib turgan, shuningdek, vaqtincha yoki doimiy yashovchi barcha toifadagi xorijliklar uchun teng sharoitlar yaratishga qaratilgani ta'kidlanmoqda. Hozircha qonun loyihasi muhokama bosqichida bo'lib, uning qachon kuchga kirishi haqida aniq ma'lumot berilmagan.
