Rossiyada kunduzgi ta'lim shaklida o'qiyotgan xorijlik talabalar endilikda rasman mehnat faoliyatini yuritishlari mumkin. Ishga joylashish jarayonida talabgorlardan bir qator hujjatlarni taqdim etish talab qilinadi. Jumladan, pasport, RVP (vaqtinchalik yashash ruxsatnomasi), RVPO (o'qish uchun vaqtinchalik yashash ruxsatnomasi) yoki VNJ (yashash guvohnomasi), mehnat daftarchasi, SNILS, ta'lim to'g'risidagi hujjatlar, harbiy hisob hujjatlari, sudlanmaganlik haqidagi ma'lumotnoma hamda tibbiy sug'urta polisi (DMS) zarur hisoblanadi. Shuningdek, ta'lim muassasasidan talaba ekanligini tasdiqlovchi ma'lumotnoma ham taqdim etilishi shart.
Ish beruvchilar xorijlik talabalarni ishga qabul qilishda bir qancha muhim jihatlarga e'tibor qaratishlari lozim. Xususan, sug'urta badallari va daromad solig'i stavkasi xodimning fuqaroligi hamda uning soliq rezidenti maqomiga qarab belgilanadi. Bundan tashqari, xorijlik talabalarni xizmat safarlariga yuborish qat'iyan man etiladi.
Qonunchilikka ko'ra, talaba o'qishdan chetlashtirilgan taqdirda, u bilan tuzilgan mehnat shartnomasi ham bekor qilinishi kerak. Ushbu qoidalarga rioya qilmaslik ish beruvchilar uchun ma'muriy javobgarlikni keltirib chiqaradi. Shu sababli, ishga joylashishni rejalashtirayotgan talabalar barcha hujjatlarning to'liqligini va ish beruvchi bilan tuziladigan shartnoma shartlarini oldindan aniqlashtirib olishlari tavsiya etiladi.
