Rossiya IIV Xabarovsk o‘lkasi bo‘yicha Migratsiya masalalari boshqarmasi yangi o‘quv yili arafasida davlat oliy o‘quv yurtlarida kunduzgi ta’lim shaklida tahsil olayotgan xorijlik talabalar uchun muhim ma’lumotlarni e’lon qildi. Unga ko‘ra, talabalar o‘qish davrida vaqtinchalik yashash ruxsatnomasini (RVPO) olish huquqiga ega.
RVPO olish talabalarga bir qator qulayliklarni taqdim etadi. Xususan, viza rejimi mavjud bo‘lgan davlatlar fuqarolari uchun Rossiyadan chiqib ketib qaytgan taqdirda, har yili viza va taklifnoma rasmiylashtirish talab etilmaydi. Bu esa hujjatlar bilan bog‘liq ortiqcha vaqt va xarajatlarning oldini oladi.
Shuningdek, ushbu ruxsatnomaga ega bo‘lgan talabalar va aspirantlar o‘qish muddati tugaganidan keyin ham 6 oy davomida Rossiya hududida qonuniy asosda qolishlari mumkin. Bu vaqt ichida ular mamlakatdan chiqib ketmasdan turib, yashash guvohnomasini (VNJ) olish uchun ariza topshirishlari yoki aspirantlar uchun dissertatsiya himoyasini yakunlashlari imkoniyati mavjud.
Mutaxassislarning qayd etishicha, o‘qishni tamomlagan xorijliklar o‘qish tugaganidan keyin 3 yil davomida Rossiyada yashash guvohnomasini olish uchun murojaat qilish huquqini saqlab qoladilar. Ushbu imtiyozlardan foydalanish istagida bo‘lgan talabalar o‘zlari tahsil olayotgan hududning migratsiya bo‘limlariga murojaat qilishlari tavsiya etiladi.
