Rossiyada vizasiz tartibda ishlovchi O‘zbekiston fuqarolari uchun patent rasmiylashtirish majburiy jarayondir. Hujjatlarni Rossiyaga kirgandan so‘ng 30 kalendar kun ichida topshirish lozim. Bunda pasport, migratsiya kartasi, vaqtinchalik ro‘yxatdan o‘tish (registratsiya), tibbiy ko‘rikdan o‘tganlik haqida ma’lumotnoma, rus tili va qonunchilik bo‘yicha sertifikat hamda tibbiy sug‘urta polisiga ega bo‘lish talab etiladi.
Patent olingandan so‘ng, migrant ikki oy muddat ichida ish beruvchi bilan mehnat shartnomasini tuzishi va uning nusxasini Rossiya IIV organlariga taqdim etishi shart. Patentning amal qilish muddati har oylik soliq (NDFL) to‘lovlarini o‘z vaqtida amalga oshirish orqali uzaytiriladi. To‘lov kechiktirilgan taqdirda patent avtomatik ravishda bekor qilinadi.
Patentni uzaytirishda eng muhim jihat — bu ro‘yxatdan o‘tish muddatining amal qilishi va tibbiy sug‘urtaning mavjudligidir. Patent maksimal 12 oy davomida amal qiladi, shundan so‘ng migrant mamlakatdan chiqib ketishi yoki hujjatlarni qaytadan rasmiylashtirishi kerak bo‘ladi. Shuningdek, ishlash ruxsatnomasi faqat u berilgan hudud doirasida amal qilishini unutmaslik lozim.
Belgilangan qoidalarni buzish, jumladan, to‘lovlarni kechiktirish yoki noqonuniy mehnat faoliyati bilan shug‘ullanish jiddiy oqibatlarga olib keladi. Bu holatda 5 000 dan 7 000 rublgacha jarima solinishi, hujjatlarning bekor qilinishi hamda Rossiyadan chiqarib yuborilib, 3 yildan 10 yilgacha kirish taqiqlanishi mumkin.
