Rossiya IIVning Balaxta-Novoselovo bo'limi xodimlari tomonidan o'tkazilgan tekshiruvlar davomida noqonuniy migratsiya holati aniqlandi. Krasnoyarsk shahrining 47 yoshli fuqarosi o'ziga tegishli bo'lgan, ammo yashash uchun yaroqsiz va vayron bo'lgan xususiy uyda 5 nafar xorijlik fuqaroni ro'yxatdan o'tkazganlikda ayblanmoqda.
Aniqlanishicha, gumonlanuvchi joriy yoz mavsumida elektron xizmatlar orqali ushbu 5 nafar migrantni Chulim qishlog'idagi yaroqsiz uyga vaqtincha ro'yxatga qo'ygan. Aslida xorijliklar ushbu manzilda yashashni rejalashtirmagan, ro'yxatdan o'tish ularga Krasnoyarsk o'lkasida qonuniy bo'lish uchun zarur bo'lgan xolos.
Hozirda ushbu shaxsga nisbatan Rossiya Jinoyat kodeksining 322.3-moddasi (chet el fuqarosini yashash joyi bo'yicha soxta ro'yxatga olish) bilan jinoyat ishi qo'zg'atilgan. Ushbu moddaga ko'ra, aybdor shaxs 5 yilgacha ozodlikdan mahrum etilishi mumkin.
Migrantlar uchun bu holat jiddiy oqibatlarga olib kelishi mumkin. Soxta ro'yxatdan o'tish faktlari aniqlanganda, xorijliklarning yashash uchun ruxsatnomalari bekor qilinishi va ularning Rossiya hududida bo'lishi noqonuniy deb topilishi ehtimoli mavjud. Shu sababli, chet el fuqarolariga o'z hujjatlarini rasmiylashtirishda faqat haqiqiy yashash manzillaridan foydalanish tavsiya etiladi.
