Chuvashiston Respublikasining Novocheboksarsk shahrida 25 yoshli xorijlik fuqaro firibgarlikda gumonlanib qo'lga olindi. Tergov ma'lumotlariga ko'ra, u ijaraga olingan “KamAZ” yuk mashinasini sotish uchun jazoni ijro etish xizmati (FSIN) xodimi formasini kiyib, o'zini davlat xizmatchisi sifatida ko'rsatgan.
Voqea 12-oktabr kuni boshlangan. Gumonlanuvchi yuk mashinasi egasiga transport vositasini koloniyadagi ishlar uchun ijaraga olmoqchi ekanligini aytib, ishonchiga kirgan. Mashina egasi bilan kelishuvga ko'ra, u transportni tekshiruv uchun Novocheboksarsk shahridagi to'xtash joyiga olib kelgan va oldindan to'lov qilib, mashina kalitlarini qo'lga kiritgan. Keyinchalik u mashinani 1 million 900 ming rubl evaziga boshqa shaxsga sotib yuborgan.
Mashina egasi GPS-kuzatuv ilovasi orqali transportning boshqa hududga ketayotganini payqab, politsiyaga murojaat qilgan va mashinani Mariy El hududidagi yoqilg'i quyish shoxobchasida topgan. U yerda mashinani sotib olgan shaxs ham aldanganini tushungan. Gumonlanuvchi esa shaharni tark etmoqchi bo'lgan vaqtda huquq-tartibot organlari tomonidan qo'lga olingan.
25 yoshli yigit o'z aybiga iqror bo'lib, jinoyatni messenjer orqali bog'langan “kurator” ko'rsatmasi bilan amalga oshirganini ma'lum qilgan. U qo'lga kiritilgan 1 million 900 ming rublni kuryerga topshirganini bildirgan. Hozirda unga nisbatan Rossiya Jinoyat kodeksining 159-moddasi 4-qismi bilan jinoyat ishi qo'zg'atilgan, shuningdek, migratsiya qonunchiligini buzgani uchun ma'muriy materiallar rasmiylashtirilgan.
