Rossiya Federatsiyasi Tergov qo'mitasining Novosibirsk viloyati bo'yicha boshqarmasi ma'lumotlariga ko'ra, 27 yoshli xorijlik fuqaroga nisbatan qo'zg'atilgan jinoyat ishi bo'yicha tergov jarayoni yakuniga yetdi. U Rossiya Jinoyat kodeksining bir nechta moddalari, jumladan, voyaga yetmagan shaxsni o'ta shafqatsizlik bilan qasddan o'ldirish hamda qiynoqqa solish ayblovlari bo'yicha javobgarlikka tortilmoqda.
Tergov xulosasiga ko'ra, 2026-yilning 25-martidan 27-apreliga qadar bo'lgan davrda gumonlanuvchi Novosibirsk shahrida o'z hamrohi va uning voyaga yetmagan farzandi bilan birga yashagan. Shu vaqt ichida u oila a'zolariga nisbatan muntazam ravishda tajovuzkorlik ko'rsatib, ayol va uning qiziga qo'l, oyoq hamda turli buyumlar yordamida tan jarohatlari yetkazib kelgan.
Jinoyat 27-aprel kuni kechqurun sodir etilgan. Gumonlanuvchi 3 yoshli qizchaning boshi va tanasining turli qismlariga ko'plab zarbalar bergan. Natijada bola hushidan ketib, shifoxonaga yotqizilgan, biroq shifokorlarning barcha urinishlariga qaramay, qizcha vafot etgan.
Tergov organlari tomonidan to'plangan dalillar asosida jinoyat ishi mazmunan ko'rib chiqish uchun sudga oshirildi. Ayblanuvchi Rossiya Jinoyat kodeksining 105-moddasi (qotillik), 117-moddasi (qiynoqqa solish) va 111-moddasi (sog'liqqa og'ir shikast yetkazish) bo'yicha sud javobgarligiga tortiladi.
