Mordoviya Respublikasi Saransk shahrida 30 yoshli chet el fuqarosi huquq-tartibot idoralari xodimiga pora berishga uringani uchun bir yil muddatga ozodlikdan mahrum etildi. Sud hukmiga ko'ra, u jazoni umumiy tartibli koloniyada o'taydi.
Voqea 2026-yilning iyun oyida Saranskdagi Pobeda ko'chasida joylashgan qurilish obyektlaridan birida o'tkazilgan reyd davomida yuz bergan. Tekshiruv jarayonida ushbu shaxs Rossiya hududida noqonuniy bo'lib turgani va tegishli ruxsatnomasiz mehnat faoliyati bilan shug'ullanayotgani aniqlangan.
Ma'muriy javobgarlikdan qochish maqsadida migrant Rossiya IIV Migratsiya masalalari boshqarmasi xodimiga 60 ming rubl miqdorida pora taklif qilgan. Politsiyachi bu taklifni rad etib, darhol navbatchilik qismiga xabar bergan. Shundan so'ng, huquqni muhofaza qiluvchi organlar tomonidan tezkor tadbir o'tkazilgan.
Ertasi kuni migrant 25 ming rubl miqdoridagi pulni pora sifatida topshirishga urinayotgan vaqtda Rossiya Federal xavfsizlik xizmati (FSB) xodimlari tomonidan qo'lga olingan. Mazkur holat yuzasidan Rossiya Federatsiyasi Jinoyat kodeksining 291-moddasi 3-qismi (pora berishga urinish) bo'yicha jinoyat ishi qo'zg'atilgan va sud jarayoni yakunlangan.
