O‘zbekiston Respublikasining 33 yoshli fuqarosi kechki ovqat tayyorlanmagani bo‘yicha kelib chiqqan janjal oqibatida o‘zining 48 yoshli hamyurtini pichoqlab o‘ldirdi. Erkaklar Yuryevetsdagi korxonalardan birida mehnat qilishgan bo‘lib, ish beruvchi ular uchun dam olish va ovqatlanish xonasini tashkil qilib bergan edi.
Viloyat prokuraturasi xabariga ko‘ra, 2026-yil 19-iyun kuni kechqurun, ishdan tashqari vaqtda, ayblanuvchi va o‘zini guruhda yoshi katta deb hisoblagan 48 yoshli muhojir o‘rtasida nizo kelib chiqqan. Yoshi katta erkak o‘sha kuni oshxonada navbatchi bo‘lgan yosh yigitga kechki ovqatni tayyorlamagani uchun e’tiroz bildirgan.
Vladimir viloyati Tergov qo‘mitasining ma’lum qilishicha, og‘zaki janjal mushtlashuvga aylanib ketgan. Janjal jarayonida aybdor oshxona pichog‘ini olib, jabrlanuvchining qorin qismiga zarba bergan. Xonada bo‘lgan boshqa ishchilar ularni ajratishga urinib, tez yordam chaqirishgan. Biroq jabrlanuvchi olgan og‘ir jarohatlari oqibatida voqea joyida vafot etgan.
Ayblanuvchi o‘z aybiga qisman iqror bo‘ldi. Uning ta’kidlashicha, tanishini o‘ldirish niyati bo‘lmagan. Hozirda mazkur jinoyat ishi ko‘rib chiqish uchun Vladimir shahrining Leninskiy tuman sudiga yuborildi.
Hamyurtini o‘ldirgan shaxsga 15 yilgacha bo‘lgan muddatga ozodlikdan mahrum qilish jazosi tayinlanishi mumkin.
