Rossiya Tergov qo‘mitasining Moskva shahri bo‘yicha boshqarmasi 2015-yilda sodir etilgan ikki kishining o‘limi bilan bog‘liq jinoyat ishi bo‘yicha tergov yakunlanganini ma’lum qildi. Ayblanuvchi 1993-yilda tug‘ilgan xorijiy fuqaro bo‘lib, unga nisbatan Rossiya Jinoyat kodeksining qotillik va bosqinchilik moddalari bo‘yicha ayblovlar ilgari surilgan.
Tergov ma’lumotlariga ko‘ra, 2015-yil 14-fevralga o‘tar kechasi ayblanuvchi Moskvadagi Shabolovka ko‘chasida joylashgan xonadonlardan biriga o‘g‘rilik maqsadida kirgan. U uy egalari — ayol va uning voyaga yetmagan qiziga hujum qilib, ularning hayotiga zomin bo‘lgan. Shundan so‘ng, gumonlanuvchi xonadondan 568 ming rubldan ortiq qiymatdagi qimmatbaho buyumlarni o‘g‘irlab, voqea joyidan yashiringan.
Jinoyat izlarini aniqlash va gumonlanuvchini topish ishlari uzoq vaqt davom etgan. Tergovchilar va kriminalistlar voqea joyidan olingan barmoq izlarini tahlil qilish hamda kuzatuv kameralari yozuvlarini o‘rganish natijasida shaxsni aniqlashga muvaffaq bo‘lishdi. Ma’lum bo‘lishicha, jinoyatdan so‘ng u Rossiya hududini tark etgan, biroq keyinchalik qaytib kelib, Kostroma viloyatida yashab kelgan.
Hozirgi vaqtda ayblanuvchi qo‘lga olingan va sud qarori bilan hibsga olingan. So‘roq jarayonida u o‘z aybiga iqror bo‘lib, jinoyatni g‘arazli niyatda sodir etganini tasdiqlagan. Tergov organlari tomonidan to‘plangan dalillar bazasi sudga oshirilgan va yaqin vaqt ichida ish mazmunan ko‘rib chiqilishi kutilmoqda.
