Samara viloyatining Novokuybishevsk shahri meri Viktoriya Katkova shahar hududidagi savdo do‘konlaridan biriga tashrif buyurganida noxush holatga duch keldi. Mer do‘kondan dukkakli mahsulotlar va quritilgan mevalar xarid qilmoqchi bo‘lgan, biroq mahsulotlar tarkibida hasharotlar borligini aniqlagan.
Shundan so‘ng, shahar rahbari sotuvchidan mahsulotlarning sifatini tasdiqlovchi hujjatlar va sertifikatlarni taqdim etishni so‘ragan. Biroq, sotuvchi bu talabga nisbatan qo‘pol munosabat bildirib, haqoratli so‘zlarni ishlatgan. Viktoriya Katkova o‘zining ijtimoiy tarmoqdagi sahifasida bu holat xaridorlar huquqlarini poymol qilish va sog‘liq uchun xavfli ekanligini ta’kidlab o‘tdi.
Qayd etilishicha, mazkur savdo nuqtasidagi barcha mahsulotlar tekshiruv uchun Rossiya Iste’molchilar huquqlarini himoya qilish xizmatiga (Rospotrebnadzor) topshirilgan. Mer xaridorlarga sifatsiz mahsulot sotib olgan taqdirda, uni qaytarib berish huquqiga ega ekanliklarini va sotuvchi rad etgan taqdirda tegishli nazorat organlariga murojaat qilishlari mumkinligini eslatib o‘tdi.
Ushbu hodisa shahar aholisi o‘rtasida muhokamalarga sabab bo‘ldi. Shahar rahbariyati mazkur savdo do‘koni faoliyatini shaxsiy nazoratiga olganini ma’lum qildi. Rossiya qonunchiligiga ko‘ra, savdo ob’ektlarida sanitariya va sifat talablariga rioya etilishi majburiy hisoblanadi.
