Rossiya Federatsiyasi Tergov qo‘mitasining Krasnodar o‘lkasi bo‘yicha boshqarmasi xabariga ko‘ra, Tixoretsk tumanida 36 yoshli xorijiy fuqaroga nisbatan jinoyat ishi qo‘zg‘atildi. U Rossiya Jinoyat kodeksining 291-moddasi 3-qismi (mansabdor shaxsga noqonuniy harakatlar uchun pora berish) bo‘yicha ayblanmoqda.
Tergov ma’lumotlariga ko‘ra, politsiya organlari tomonidan olib borilayotgan tekshiruv jarayonida xorijiy fuqaroning tanishiga tegishli kompyuter texnikasi va transport vositasi vaqtincha olib qo‘yilgan. Ayblanuvchi tanishining xabarisiz, ushbu buyumlarni qaytarib olish maqsadida politsiya xodimi bilan uchrashgan.
Joriy yilning 17-iyul kuni ayblanuvchi huquq-tartibot organi xodimiga 100 ming rubl miqdorida pora taklif qilgan. Biroq, politsiya xodimi ushbu taklifni rad etgan va mazkur holat yuzasidan tegishli choralar ko‘rilgan. Hozirda xorijiy fuqaro sud qarori bilan qamoqqa olingan.
Jinoyat ishi bo‘yicha tergov harakatlari davom etmoqda. Mazkur jarayon Rossiya Federal xavfsizlik xizmatining Krasnodar o‘lkasi bo‘yicha boshqarmasi bilan hamkorlikda amalga oshirilmoqda.
