Irkutsk viloyati huquq-tartibot organlari tomonidan o‘tkazilgan besh kunlik reydlar davomida migratsiya va mehnat qonunchiligi bilan bog‘liq 250 ta qoidabuzarlik qayd etildi. Tekshiruvlar qishloq xo‘jaligi, o‘rmon xo‘jaligi, savdo nuqtalari va transport infratuzilmasi obyektlarini qamrab oldi.
Tekshiruv natijalariga ko‘ra, 55 nafar xorij fuqarosiga nisbatan Rossiya Federatsiyasi hududidan ma’muriy tartibda chiqarib yuborish to‘g‘risida qaror qabul qilindi. Shuningdek, 42 nafar shaxs mehnat faoliyatini belgilangan tartibni buzgan holda amalga oshirgani uchun javobgarlikka tortildi.
Reydlar davomida taksi xizmatida ishlash bo‘yicha o‘rnatilgan cheklovlarni buzgan 6 nafar xorijlik aniqlandi. Bundan tashqari, xorijlik ishchilarni noqonuniy jalb qilgan ish beruvchilarga nisbatan 31 ta ma’muriy bayonnoma rasmiylashtirildi. Huquq-tartibot organlari migratsiya sohasidagi jinoyat alomatlari bo‘yicha 15 ta holat yuzasidan surishtiruv ishlarini olib bormoqda.
Irkutsk viloyati IIV boshqarmasi bunday profilaktik tadbirlar doimiy asosda o‘tkazilishini eslatib o‘tadi. Migrantlardan o‘z hujjatlarini tartibga keltirish va Rossiya qonunchiligida belgilangan mehnat faoliyati qoidalariga qat’iy rioya qilish so‘raladi.
