Rossiya IIV Migratsiya xizmati xodimlari Moskva mintaqasida, xususan, "Kotelniki" metro bekati yaqinida migratsiya qonunchiligiga rioya etilishini nazorat qilish bo'yicha profilaktik tadbir o'tkazdi. Reyd davomida mamlakatda bo'lish muddatini qonunda belgilanganidan ortiqcha uzaytirib yuborgan 80 nafar xorijiy fuqaro aniqlandi.
Qoidabuzarlarni aniqlashda transport infratuzilmasi, jumladan, Moskva metrosida o'rnatilgan maxsus tizimlar va mobil biometrik identifikatsiya vositalari kabi zamonaviy texnologiyalardan foydalanildi. Ushbu innovatsion usullar yo'lovchilar oqimi ko'p bo'lgan hududlarda ham qonunbuzarlarni onlayn rejimda tezkor aniqlash imkonini bermoqda.
Aniqlangan 80 nafar shaxsga nisbatan ma'muriy huquqbuzarlik to'g'risida bayonnomalar rasmiylashtirildi. Qonunchilikka ko'ra, ushbu fuqarolarga jarima solinishi hamda ularning Rossiya Federatsiyasi hududidan ma'muriy tartibda chiqarib yuborilishi ko'zda tutilgan.
Ushbu tadbirda Rossiya IIV Migratsiya masalalari markazi vakillari, viloyat politsiyasi xodimlari hamda Milliy gvardiya kuchlari ishtirok etdi. Rasmiylar bunday profilaktik reydlar kelgusida ham davom ettirilishini ma'lum qildi.
