Nizhnevartovsk shahrida Rossiya IIV xodimlari va Rosgvardiya maxsus bo'linmalari ishtirokida migratsiya qonunchiligiga rioya etilishini tekshirish bo'yicha kompleks profilaktika tadbirlari o'tkazilmoqda. Reydlar davomida xorijliklar yashaydigan joylar, qurilish maydonchalari, savdo va xizmat ko'rsatish obyektlari ko'zdan kechirildi.
Tekshiruvlar natijasida Rossiya Ma'muriy huquqbuzarliklar to'g'risidagi kodeksining 18.8–18.17 hamda 19.27-moddalari bo'yicha jami 69 ta ma'muriy bayonnoma rasmiylashtirildi. Ushbu moddalar xorijliklarning mamlakatga kirish, qolish va ishlash qoidalarini buzish, shuningdek, migratsiya hisobiga oid noto'g'ri ma'lumotlar taqdim etish kabi qoidabuzarliklarni o'z ichiga oladi.
Qonunchilikni jiddiy tarzda buzganligi aniqlangan 12 nafar xorij fuqarosiga nisbatan Rossiya Federatsiyasi hududidan ma'muriy tartibda chiqarib yuborish to'g'risida qaror qabul qilindi. Huquq-tartibot organlari mazkur yo'nalishdagi profilaktika ishlarini davom ettirmoqda.
Migrantlarga o'z hujjatlarining to'g'riligini va ishlash hamda yashash qoidalariga rioya etilishini doimiy nazoratda saqlash tavsiya etiladi. Qonun buzilishlarining oldini olish uchun barcha ruxsatnomalar va ro'yxatdan o'tish hujjatlari belgilangan tartibda bo'lishi shart.
