Novosibirsk viloyati IIV xodimlari tomonidan o'tkazilgan keng ko'lamli tekshiruvlar davomida migratsiya sohasida 612 ta ma'muriy qoidabuzarlik qayd etildi. Ularning asosiy qismini, ya'ni 361 ta holatni Rossiyaga kirish qoidalari yoki mamlakatda bo'lish tartibini buzish tashkil etadi. Shuningdek, 125 ta holatda bo'lish qoidalariga rioya qilmaslik, 29 ta holatda noqonuniy mehnat faoliyati va 53 ta holatda xorijliklarni noqonuniy ishga jalb qilish holatlari aniqlangan.
Tekshiruv yakunlari bo'yicha 116 nafar shaxsga nisbatan mamlakatdan chiqarib yuborish to'g'risida qaror qabul qilindi. Ulardan 106 nafari maxsus muassasalarda saqlangan holda, konvoy ostida majburiy tartibda Rossiya hududidan chiqarib yuborildi. Bundan tashqari, jazoni o'tash joylaridan ozod etilgan 7 nafar xorijlik fuqaro ham deportatsiya qilindi. Yana 233 nafar shaxsga nisbatan Rossiyaga kirish taqiqi qo'yildi.
Huquqni muhofaza qiluvchi organlar, ayniqsa, mamlakatni tark etish haqida ogohlantirish olgan bo'lsa-da, uni bajarmagan shaxslarga alohida e'tibor qaratdi. Bunday qoidabuzarlik sodir etgan 2 nafar xorijlik fuqaro majburiy tartibda chiqarib yuborildi va ularning Rossiyaga kirishi 10 yil muddatga taqiqlandi. Shuningdek, nazorat ostidagi shaxslar reestrida bo'lgan 118 nafar xorijlikka nisbatan ma'muriy choralar ko'rildi.
Tekshiruvlar davomida ma'muriy javobgarlikdan tashqari, 36 ta jinoyat ishi ham qo'zg'atildi. Ularning 16 tasi xorijlik fuqarolarni soxta ro'yxatdan o'tkazish, 14 tasi noqonuniy migratsiyani tashkil etish va 6 tasi soxta ro'yxatga olish moddalari bilan bog'liq. Migrantlardan qonun hujjatlariga qat'iy rioya qilish va belgilangan muddatlarda hujjatlarni rasmiylashtirish talab etiladi.
