Rossiya fuqaroligidan mahrum qilingan migrant 35 yilga mamlakatga kirish huquqidan ayrildi
Cheboksari shahrida Rossiya fuqaroligini olgan Markaziy Osiyo davlatlaridan birining fuqarosi Rossiya fuqaroligidan mahrum etildi. Rasmiy ma'lumotlarga ko'ra, bunga shaxsning mahalliy diaspora vakillari o'rtasidagi faoliyati va ommaviy bayonotlari sabab bo'lgan.
Tekshiruv jarayonida aniqlanishicha, erkak o'z vatandoshlarini Rossiya Federatsiyasida o'tkazilayotgan maxsus harbiy operatsiyaga qarshi chiqishga hamda harbiy hisobga turishdan bo'yin tovlashga chaqirgan. Shuningdek, u milliy ustunlik g'oyalarini targ'ib qilgani va shahar bozorlaridan birida noqonuniy ibodatxona tashkil etgani qayd etilgan.
Ushbu harakatlar ortidan tegishli organlar tomonidan fuqarolikni bekor qilish to'g'risida qaror qabul qilindi. Bundan tashqari, mazkur shaxsga nisbatan Rossiya Federatsiyasi hududiga kirishga 35 yillik taqiq qo'yildi. Hozirgi vaqtda u Rossiya hududini tark etgan.
