Xanti-Mansiysk avtonom okrugining Kondinskiy tuman sudi xorijlik ayolning Rossiyadan chiqarib yuborish to'g'risidagi qarorni bekor qilish haqidagi iltimosini rad etdi. Ayol migratsiya qoidalarini buzgani uchun 2000 rubl miqdorida jarimaga tortilgan va mamlakatdan ma'muriy tartibda chiqarib yuborilishi belgilangan.
Sud jarayonida ayol o'z xatosini tan olgan, biroq Rossiya fuqarosi bo'lgan turmush o'rtog'i va 7-oktabrda tug'ilgan, Rossiya fuqaroligiga ega qizi borligini vaj qilib keltirgan. Shuningdek, uning turmush o'rtog'i Rossiyada doimiy yashash joyi va ishiga ega ekanligi ta'kidlangan.
Biroq sud qarorida qayd etilishicha, Rossiya fuqarosi bilan nikohda bo'lish yoki Rossiya fuqaroligiga ega farzandning mavjudligi xorijlik fuqaroni migratsiya qonunchiligiga rioya qilish majburiyatidan ozod etmaydi. Sud mazkur holatda qonun ustuvorligini asos qilib olib, politsiya tomonidan chiqarilgan deportatsiya qarorini o'z kuchida qoldirdi.
Hozirgi vaqtda mazkur sud qarori hali qonuniy kuchga kirmagan. Shu sababli, ayol yuqori instansiya sudiga shikoyat qilish huquqiga ega. Ushbu holat Rossiyada yashovchi migrantlar uchun migratsiya tartib-qoidalariga qat'iy rioya qilish muhimligini yana bir bor eslatadi.
