Kansk okrugi politsiyasi tomonidan o‘tkazilgan tekshiruvlar davomida ishlab chiqarish korxonalaridan birida noqonuniy mehnat faoliyati bilan shug‘ullanib kelgan 7 nafar xorij fuqarosi aniqlandi. Mazkur shaxslar Rossiya hududiga qonuniy asosda kirib kelgan bo‘lsalar-da, tegishli ruxsatnomalarsiz ishlashgan.
Tekshiruv vaqtida xorijliklar o‘zlarini «ekoturizm» va «tadbirkorlik» maqsadida korxona faoliyati bilan tanishayotgan mehmonlar deb tushuntirishga urinishgan. Biroq, ularning viza maqsadlari haqiqiy faoliyatiga mos kelmasligi aniqlangach, bu vajlar inobatga olinmadi.
Politsiya xodimlari har bir xorij fuqarosiga nisbatan ikkita ma’muriy bayonnoma rasmiylashtirdi. Rossiya Ma’muriy huquqbuzarliklar to‘g‘risidagi kodeksining 18.8 va 18.10-moddalariga binoan, ular jarimaga tortildi va mamlakatdan nazorat ostida mustaqil ravishda chiqib ketish (deportatsiya) majburiyati yuklandi.
Shuningdek, ushbu migrantlarni noqonuniy ravishda ishga qabul qilgan korxona rahbariyatiga nisbatan ham tekshiruv ishlari olib borilmoqda. Ish beruvchilar qonunbuzarlik uchun qonunchilikda belgilangan tartibda javobgarlikka tortiladi.
