Ulyanovsk viloyatida 1-oktabrdan 10-oktabrgacha «Noqonuniy migrant – 2026» federal operatsiyasining ikkinchi bosqichi o'tkazilmoqda. Rossiya IIVning mintaqaviy boshqarmasi ma'lumotlariga ko'ra, 1-oktabrdan 5-oktabrgacha bo'lgan davrda politsiya xodimlari 67 ta obyektni, jumladan, migrantlar ixcham yashaydigan 34 ta manzilni tekshiruvdan o'tkazdi.
Tekshiruvlar davomida jami 256 ta ma'muriy qoidabuzarlik qayd etilgan. Ulardan 162 tasi xorijliklarning Rossiyaga kirish, chiqish va bo'lish qoidalarini buzishi, 94 tasi esa mehnat faoliyatini amalga oshirish tartibiga rioya qilmaslik bilan bog'liq. Shuningdek, xorijliklarni noqonuniy ishga jalb qilgan yuridik shaxslarga nisbatan Rossiya Ma'muriy javobgarlik to'g'risidagi kodeksining 18.15-moddasi bo'yicha 15 ta bayonnoma rasmiylashtirilgan.
Qoidabuzarliklar natijasida 24 nafar xorijlik fuqaroning Rossiyaga kirishi cheklangan bo'lsa, mamlakat hududida noqonuniy bo'lib turgan 38 nafar shaxsga nisbatan ma'muriy tartibda chiqarib yuborish to'g'risida qaror qabul qilingan.
Bundan tashqari, huquq-tartibot organlari tomonidan 3 ta jinoyat ishi qo'zg'atilgan. Ulardan ikkitasi xorijliklarni soxta hisobga qo'yish (Rossiya Jinoyat kodeksining 322.3-moddasi) va bittasi Rossiya fuqarosi pasportini qalbakilashtirish (Rossiya Jinoyat kodeksining 327-moddasi) holatlari bilan bog'liq.
