Rossiya IIVning Novosibirsk viloyati bo'yicha Migratsiya masalalari boshqarmasi xodimlari tomonidan o'tkazilgan tekshiruvlar davomida Markaziy Osiyo davlatlaridan birining fuqarosi aniqlandi. Mazkur shaxsda atrofidagilar uchun xavf tug'diruvchi yuqumli kasallik mavjudligi ma'lum bo'ldi.
Rossiya Federatsiyasi hududida jamoat salomatligini himoya qilish maqsadida, Rospotrebnadzor boshqarmasi tomonidan ushbu fuqaroning mamlakatda bo'lishi nomaqbul deb topildi. Shunga ko'ra, tegishli qaror qabul qilinib, xorijiy fuqaro Rossiya hududidan deportatsiya qilindi.
Shuningdek, politsiya xodimlari tomonidan ushbu shaxsning Rossiya Federatsiyasiga qayta kirishi taqiqlandi. Bu kabi choralar mamlakatda epidemiologik xavfsizlikni ta'minlash va aholi salomatligini saqlash maqsadida amalga oshiriladi.
Eslatib o'tamiz, Rossiya qonunchiligiga ko'ra, xorijiy fuqarolar mamlakatda qonuniy bo'lishlari uchun tibbiy ko'rikdan o'tishlari va sog'liqni saqlash talablariga rioya qilishlari shart. Kasallik aniqlangan taqdirda, tegishli idoralar tomonidan majburiy chiqarib yuborish choralari ko'rilishi mumkin.
