Rossiya IIVning Saxa Respublikasi (Yoqutiston) bo'yicha boshqarmasi xodimlari «Noqonuniy-2026» tezkor-profilaktik tadbirlari doirasida keng ko'lamli tekshiruvlarni amalga oshirdi. 1-oktabrdan 4-oktabrgacha bo'lgan davrda politsiya va Federal xavfsizlik xizmati vakillari xorijliklar yashaydigan va ishlaydigan 985 ta obyektni ko'zdan kechirdi.
Tekshiruvlar natijasida jami 2862 nafar xorijiy fuqaro nazoratdan o'tkazildi va migratsiya qonunchiligining 97 ta buzilishi qayd etildi. Qoidabuzarliklar uchun umumiy hisobda 282 000 rubl miqdorida ma'muriy jarimalar belgilandi. Shuningdek, 14 nafar shaxs Rossiya Federatsiyasi hududidan ma'muriy tartibda chiqarib yuborilishi (vidvoreniye) to'g'risida qaror qabul qilindi.
Bundan tashqari, huquq-tartibot organlari tomonidan 5 nafar xorijlikka Rossiyaga kirish taqiqlandi, yana 5 kishining vaqtincha yashash muddati qisqartirildi va bir kishi deportatsiya qilinishi belgilandi. Tekshiruv davomida bir nafar xorijiy fuqaroda soxta hujjatlar aniqlangan.
Shu bilan birga, migratsiya sohasidagi jinoyatlarni (Rossiya Jinoyat kodeksining 322.1 va 322.3-moddalari) nazarda tutuvchi 13 ta holat aniqlandi. Ushbu faktlar yuzasidan qonunchilikka muvofiq protsessual qarorlar qabul qilinishi ma'lum qilindi. Yoqutsk shahrida migratsiya nazorati bo'yicha profilaktik tadbirlar davom etmoqda.
