Kamchatka o‘lkasi, Petropavlovsk-Kamchatskiy shahrida yashovchi 44 yoshli fuqaro xorijiy fuqarolarni soxta migratsiya hisobiga qo‘yganlikda ayblanmoqda. Rossiya IIVning hududiy boshqarmasi xabariga ko‘ra, mazkur holat yuzasidan jinoyat ishi qo‘zg‘atilgan.
Tergov ma’lumotlariga ko‘ra, joriy yilning iyun va iyul oylari davomida ayol o‘ziga tegishli bo‘lgan ikkita turar joy manzilida yaqin xorij davlatlaridan birining 18 nafar fuqarosini ro‘yxatdan o‘tkazgan. Biroq, ushbu shaxslar ko‘rsatilgan manzillarda haqiqatda yashamagan va ularga turar joy taqdim etilmagan.
Aniqlanishicha, ayol xorijliklarni soxta ro‘yxatga olish evaziga pul mukofoti olib turgan. Hozirda gumonlanuvchiga nisbatan “yashash joyidan ketmaslik va o‘zini munosib tutish” tarzidagi ehtiyot chorasi qo‘llanilgan.
Rossiya Federatsiyasi Jinoyat kodeksining 322.3-moddasiga ko‘ra, xorijiy fuqarolarni soxta migratsiya hisobiga qo‘yganlik uchun qonunchilikda besh yilgacha ozodlikdan mahrum qilish jazosi nazarda tutilgan. Ayni damda voqea yuzasidan surishtiruv ishlari davom etmoqda.
