Moskva shahrida vaqtinchalik yashash ruxsatnomasi (RVP) olish uchun kvota ajratish bo'yicha arizalar qabul qilish jarayoni boshlanadi. Rossiya IIV ma'lumotlariga ko'ra, fuqarolar 1, 2 va 5-oktabr kunlari o'z arizalarini topshirishlari mumkin.
Arizalar soat 08:30 dan 17:00 gacha qabul qilinadi. Jarayon Moskva shahri, Voronovo munitsipal okrugi, Varshava shossesi, 64-kilometr, 1-uy, 47-bino manzilida joylashgan “Saxarovo” ko'p funksiyali migratsiya markazida amalga oshiriladi. Ariza topshiruvchilar markazning 1A-kirish qismiga murojaat qilishlari kerak.
Kvota olish uchun ariza topshirishda quyidagi hujjatlar talab etiladi: to'ldirilgan va chop etilgan ariza blankasi, shaxsni tasdiqlovchi hujjat (pasport) va uning nusxasi, Rossiya Federatsiyasida qonuniy bo'lib turganligini tasdiqlovchi hujjatlar (migratsiya kartasi, Moskva bo'yicha migratsiya hisobi) hamda 35x45 mm o'lchamdagi fotosurat.
Migrantlar hujjatlarni topshirishdan avval barcha talablarni diqqat bilan o'rganib chiqishlari va belgilangan muddatlarga rioya qilishlari tavsiya etiladi.
