Rossiya Federatsiyasi Tergov qo‘mitasining Irkutsk viloyati bo‘yicha boshqarmasi xabariga ko‘ra, Bratsk shahrida to‘rt nafar xorijiy fuqaro va bir nafar mahalliy ayolga nisbatan sud hukmi chiqarildi. Ular harbiy shon-sharaf ramzlarini haqorat qilish hamda noqonuniy migratsiyani tashkil etish bilan bog‘liq jinoyatlarda aybdor deb topildi.
Tergov ma’lumotlariga ko‘ra, 2024-yil sentyabr oyida to‘y marosimi vaqtida bir guruh xorijliklar Bratskdagi Shon-sharaf memoriali oldida suratga tushishgan. Shu vaqtda ulardan biri yodgorlik ustiga chiqqan, qolgan ikki nafari esa abadiy olov yaqinida baland ovozli musiqa ostida raqsga tushgan. Ushbu harakatlar ijtimoiy tarmoqlarda tarqalib, jamoatchilik e’tiborini tortgan.
Shuningdek, tergov jarayonida noqonuniy migratsiya bilan bog‘liq holatlar ham aniqlangan. Xususan, ayblanuvchilardan biri 2021-yilda Rossiya fuqarosi bilan soxta nikoh qurish orqali yashash uchun ruxsatnoma olgan. Keyinchalik, 2022-yilda u ushbu ayol bilan til biriktirib, soxta ma’lumotlar asosida farzandining otaligini boshqa xorijiy fuqaroga rasmiylashtirgan, bu esa unga Rossiyada qonuniy yashash huquqini olish imkonini bergan.
Sud qaroriga ko‘ra, ayblanuvchilarga nisbatan 2,5 yildan 3 yilgacha shartli jazolar tayinlandi. Ayrim shaxslarga davlat xizmatida ishlash, pedagogik va ilmiy faoliyat bilan shug‘ullanish taqiqlandi. Shuningdek, soxta nikoh va otalik haqidagi yozuvlar bekor qilindi.
