Moskva metrosining «Rijskaya» bekatida yo‘lovchi ayolga nisbatan nojo‘ya xatti-harakatlar sodir etgan erkak qo‘lga olindi. Hodisa 26-iyul kuni eskalatorda yuz bergan. Ma’lumotlarga ko‘ra, «Fud-Siti» ulgurji bozori mehmonxonasida ro‘yxatdan o‘tgan shaxs eskalatorda oldinda turgan qizga nisbatan shilqimlik qilgan.
Jabrlanuvchi ayol darhol politsiyaga murojaat qilgan. Huquq-tartibot organlari tomonidan o‘tkazilgan tekshiruv va kuzatuv kameralari yozuvlari erkakning qilmishini tasdiqlagan. Gumonlanuvchi o‘z harakatlarini tasodif deb oqlashga uringan bo‘lsa-da, dalillar uning aybini isbotlagan.
Ostankino sudi mazkur holat yuzasidan qaror chiqardi. Unga ko‘ra, mayda bezorilik sodir etgan shaxs 8 sutka muddatga ma’muriy qamoq jazosiga hukm qilindi. Rossiya qonunchiligiga ko‘ra, jamoat joylarida tartibni buzish va boshqalarning shaxsiy daxlsizligiga tajovuz qilish qat’iy javobgarlikka sabab bo‘ladi.
