Moskva viloyati huquq-tartibot organlari Serpuxov shahar okrugida sodir etilgan mudhish qotillik yuzasidan tergov harakatlarini yakunlab, jinoyat ishini sudga yubordi. Rossiya Tergov qo‘mitasi va viloyat prokuraturasining rasmiy bayonotiga ko‘ra, ayblanuvchi sifatida so‘roq qilinayotgan 29 yoshli xorij fuqarosi o‘z farzandini qasddan o‘ldirganlikda ayblanmoqda.
Tergov materiallariga ko‘ra, voqea 2026-yilning fevral oyida Serpuxov okrugiga qarashli Bolshevik qishlog‘idagi ijaraga olingan xonadonda sodir bo‘lgan. Mehnat migranti bo‘lgan ayol kvartiraning hammomida tirik qiz farzand dunyoga keltirib, tibbiy yordamga murojaat qilish o‘rniga yangi tug‘ilgan chaqaloqqa pichoq bilan kamida 16 marta og‘ir jarohat yetkazgan.
Go‘dak olingan jarohatlar oqibatida voqea joyida vafot etgach, ayol jinoyat izlarini yashirish maqsadida uning jasadini sochiqqa o‘rab, Lenin ko‘chasidagi koʻp qavatli uylar hovlisida joylashgan axlat konteynerlari maydonchasiga tashlab ketgan. Chaqaloqning jasadi oradan ikki oy o‘tib, 2026-yilning 21-aprel kuni mahalliy aholi tomonidan tasodifan topilgan. Jinoyatni issiq izlar orqali ochish imkoni bo‘lmagan bo‘lsa-da, zamonaviy kriminalistika va tibbiy-genetik ekspertiza yordamga keldi. Huquq-tartibot organlari xorijlik ayolning shaxsini tez fursatda aniqlashga muvaffaq bo‘lishdi, chunki gumonlanuvchi muqaddam Rossiya hududiga kirishda migrantlar uchun majburiy bo‘lgan genom ro‘yxatidan (barmoq izi va DNK namunasini topshirish jarayonidan) o‘tgan edi.
Chaqaloq va voqea joyidan olingan DNK namunalari bazadagi ma’lumotlar bilan solishtirilganda to‘liq mos kelgan. Hibsga olingan ayol tergov davomida o‘z aybiga to‘liq iqror bo‘lib, qilmishidan pushaymonligini bildirgan va hozirda u tergov izolyatorida saqlanmoqda. Serpuxov shahar prokuraturasi jinoyat ishi bo‘yicha ayblov xulosasini tasdiqladi va materiallar mazmunan ko‘rib chiqish uchun Serpuxov shahar sudiga yuborildi. Ayolga nisbatan Rossiya Federatsiyasi Jinoyat kodeksining 106-moddasi (Ona tomonidan yangi tug‘ilgan bolani o‘ldirish) bo‘yicha yakuniy hukm chiqariladi.
