Vladivostokning Leninskiy tuman sudi Primorye o'lkasi Migratsiya masalalari boshqarmasining sobiq boshlig'i Vladimir Chekmenev va uning qo'l ostidagi xodim Oksana Golubchanskaya ustidan hukm chiqardi. Polkovnik Chekmenev mansab vakolatini suiiste'mol qilish, chet elliklarning Rossiyada noqonuniy bo'lishini tashkil etish va loqaydlikda aybdor deb topilib, 4 yil 6 oyga ozodlikdan mahrum etildi. Oksana Golubchanskaya esa 3 yil 6 oy muddatga hukm qilindi, biroq uning jazoni o'tashi farzandi 14 yoshga to'lguniga qadar kechiktirildi.
Prokuratura ma'lumotlariga ko'ra, 2022-yilning dekabr oyidan 2023-yilning avgust oyigacha bo'lgan davrda ushbu mansabdor shaxslar 60 nafar xorijlik fuqaroning patentlarini qonunda belgilangan muddatlarni buzgan holda qayta rasmiylashtirgan. Natijada, ushbu shaxslarning Rossiya hududida qolishi noqonuniy deb topilgan. Shuningdek, boshqarma boshlig'i o'z xodimlarining ishini to'g'ri tashkil etmagani oqibatida besh nafar noqonuniy migrant tomonidan og'ir jinoyatlar sodir etilgani va xorijliklarning ommaviy ravishda soxta migratsiya hisobiga qo'yilgani aniqlangan.
Tergov versiyasiga ko'ra, mansabdor shaxslar tomonidan amalga oshirilgan noqonuniy sxema doirasida 41 ta patent muddat o'tib ketganidan so'ng qayta rasmiylashtirilgan va yana 19 nafar xorijlik fuqaro noqonuniy tarzda migratsiya hisobiga qo'yilgan. Ushbu harakatlar migrantlarning Rossiyada qonuniy asoslarsiz qolishiga imkon yaratgan.
Bundan tashqari, ushbu ish doirasida Vladivostokda faoliyat yuritgan jinoiy guruh ham fosh etildi. Tergov ma'lumotlariga ko'ra, guruh a'zolari xorijlik fuqarolarga hujum qilib, ulardan pul talab qilgan va jabrlanuvchilardan 700 ming rubldan ortiq mablag' undirgan. Hozirda jinoiy guruh a'zolarining ishi Primorye o'lka sudida ko'rib chiqilmoqda.
