Rossiya Tergov qo'mitasining Amur viloyati bo'yicha boshqarmasi 49 yoshli Markaziy Osiyo davlati fuqarosiga nisbatan ochilgan jinoyat ishi bo'yicha tergov yakunlanganini ma'lum qildi. U Rossiya Jinoyat kodeksining 318-moddasi 1-qismi (hokimiyat vakiliga nisbatan hayot va sog'liq uchun xavfli bo'lmagan zo'ravonlik ishlatish) bo'yicha ayblanmoqda.
Voqea 2026-yilning avgust oyida R-297 «Amur» avtomobil yo'lida sodir bo'lgan. YPX inspektori hujjatlarni tekshirish uchun to'xtatgan haydovchida mastlik alomatlarini aniqlagan. Shuningdek, tekshiruv davomida fuqaroning Rossiyada bo'lish muddati o'tib ketgani, tegishli toifadagi haydovchilik guvohnomasisiz va taxograf qoidalarini buzgan holda avtomobil boshqargani ma'lum bo'lgan.
Ma'muriy bayonnoma rasmiylashtirilishi va avtomobil jarima maydonchasiga qo'yilishidan xavfsiragan haydovchi voqea joyidan yashirinishga uringan. Inspektor uni to'xtatishga uringanda, ayblanuvchi xodimning bo'yin va yelka qismiga bir necha bor zarba bergan. Natijada xodim yengil tan jarohati olgan, biroq dvigatelni o'chirib, haydovchini qo'lga olishga muvaffaq bo'lgan.
Tergov davomida jabrlanuvchining ko'rsatmalari va patrul avtomobilidagi videoregistrator yozuvlari dalil sifatida olingan. Ayblanuvchi o'z aybiga iqror bo'lmagan bo'lsa-da, sud qarori bilan unga nisbatan qamoqqa olish tarzidagi ehtiyot chorasi qo'llanilgan. Hozirda jinoyat ishi sudga oshirilishga tayyorlanmoqda.
