Rossiya Davlat Dumasi 2027-yilgi federal budjet loyihasini birinchi o'qishda ko'rib chiqdi. Hujjatni qabul qilish jarayoni parlamentda qizg'in bahslarga sabab bo'ldi: 372 deputat yoqlab ovoz bergan bo'lsa, 51 nafari betaraf qoldi. Budjet loyihasiga ko'ra, mamlakat xazinasida 5,5 trillion rubl miqdorida defitsit (daromad va xarajat o'rtasidagi farq) kutilmoqda, bu mamlakat yalpi ichki mahsulotining 2,2 foizini tashkil etadi.
Rossiya moliya vaziri Anton Siluanovning ta'kidlashicha, budjet tashqi iqtisodiy chaqiriqlarga chidamli bo'lib, barcha ijtimoiy majburiyatlarni bajarishni kafolatlaydi. Xususan, 2027–2029-yillarda bolalarni tarbiyalash uchun mo'ljallangan oylik nafaqalar 7,8 million oilaga ajratilishi rejalashtirilgan. Shuningdek, ona kapitali 1,9 milliondan ortiq oilaga, oilaviy to'lovlar esa 2 milliondan ortiq ota-onaga har yili taqdim etilishi ko'zda tutilgan.
Deputatlar o'rtasidagi bahslarda soliq yuklamalari masalasi ham ko'tarildi. Ayrim siyosiy partiyalar vakillari soliqlar va bojxona yig'imlarining oshirilishi xavfidan ogohlantirib, xarajatlarni optimallashtirish zarurligini ta'kidlashdi. Xususan, elektron savdo va xorijiy posilkalar uchun qo'shilgan qiymat solig'i (NDS) hamda mulk solig'ining oshirilishi tanqidiy muhokama qilindi.
Budjet loyihasi bo'yicha yakuniy qaror ikkinchi o'qishda qabul qilinadi. Hukumat vakillari deputatlarning takliflarini o'rganib chiqish va budjet ustuvorliklarini aniqlashtirish bo'yicha ishlarni davom ettirishini ma'lum qildi. Migrantlar va xorijiy ishchilar uchun ushbu budjet siyosati iqtisodiy barqarorlik va soliq qonunchiligidagi o'zgarishlar orqali bilvosita ta'sir ko'rsatishi mumkin.
